من صغر سني وانا أنظر للغلا نظره رفيعة.....واعرف ان العشرة اسمى من غلاك ومن حناني
يوم شفتك من ضياع وشفتني مثل الوديعة.....انته اللي ضعت فيني وانت بس اللي لقاني
والله ان الضيعة اللي جابتك ماهي بضيعة .....ضيعة العشاق شي وضيعتي بك شي ثاني
ياغرام ما استطيع انساه لو قلت استطيعه.....يا كلام من عرفته ماذرفته من لساني
اشتر اللي تشتري فيني وبيع اللي تبيعه.....ما التفت لوجه غيرك باعني والا شراني
خل طعناتك قوية وخل نظراتك سريعة.....يعني اضرب اهرب اضرب اضرب اهرب في ثواني
ماانت باول من شرب صيفي وعطشني ربيعه .....ولا انت بآخر من خذاني من يدي ولاخذاني
انت ما وسعت صدري لين ضيقت الوسيعة.....كنك تحطب الجروح من المحاني للمحاني
كل ساعة لك بصدري رمح أقسى من تبيعه.....وكل جرح له بوجهي حزن غير الأولاني
وكل ليل يهون لكن ليلة البارح فظيعة.....يعلم الله كانت اول ليله تزلزل كياني
كن رمحك مايبات الا ورا الحدب المنيعة.....وكن جرحي ما يعرف ينام ورماحك تعاني
في زمنا قالوا ان ماطاوعك هالوقت طيعه .....وانت مثل الوقت قاسي طاعني و الا عصاني
بس ابيك ليا عسفت البعد واسرجت القطيعة.....التفت مرة علي وحط نفسك في مكاني
انت لو اني خدعتك راح ترضى بالخديعة.....بعتني مليون مره… حبني مره عشاني
خايف تحمل خفوقي فوق مالا يستطيعه.....ويبتليك الله بغيري مثل ما فيك ابتلاني
خلني مثل الضياع وشلَني مثل الوديعه.....انت من ضيعتني ما في أحد غيرك لقاني
واشهد ان الضيعة اللي جابتك ما هي بضيعه.....ضيعه العشاق شي وضيعتي بك شي ثاني
م/ن
تحياتي شمووسهـ